Elan və Xəbərlər

Bakı Zooloji Parkında Bakı Dövlət Universitetinin tələbələri üçün istehsalat təcrübəsinə başlanılıb

Bakı Zooloji Parkı və Bakı Dövlət Universitetinin ekologiya və torpaqşünaslıq fakültəsinin əməkdaşlığı çərçivəsində 16.02.2024 tarixindən etibarən Zooloji Parkda lV kurs tələbələri üçün istehsalat təcrübəsi təşkil olunub. 
Təcrübə zamanı gənclər Bakı Zooloji Parkında görülən işlər ilə yaxından tanış olduqdan sonra qruplar üzrə akvaterrarium, maarifləndirmə, məməlilər və quşlar bölmələrində keçirilən təlimlərdə iştirak ediblər. İstehsalat təcrübəsinin istiqamətləri həm müasir dövrün tələblərinə uyğun, həm də təhsil müddəti ərzində əldə edilmiş nəzəri biliklərin tətbiqinə imkan verən praktik bacarıqların formalaşdırılmasına yönəldilmişdir. Təlimlərə müvafiq bölmələr üzrə Zooloji Park mütəxəssisləri rəhbərlik edib.
Tələbələr istehsalat təcrübəsi zamanı heyvanların etologiya, biologiya, ekologiya, həyat tərzi ilə maraqlanaraq, heyvanlara qulluq edib, videoçəkilişlərini aparıblar. Bununla yanaşı, təcrübəçilər volyerlərin zənginləşdirilməsi, biomüxtəlifliyinin qorunmasının təşkili ilə bağlı tədbirlərə qoşulub, Zooloji Park ərazisində ziyarətçilərə bələdçilik edərək ekskursiyalar keçirib, balaca qonaqlar üçün ustad dərsləri təşkil ediblər.
Təcrübə dövründə tələbələrdə təbiətə qarşı rəğbət və qayğı hisləri formalaşdırılmış, gənclər ixtisasla bağlı bilik və bacarıqlara, məsuliyyətlilik, prioritetləşdirmə, düzgün qərarvermə, dəqiqlik, analitik düşüncə kimi bir çox peşəkar kompetensiyalara yiyələnmişlər. 
İstehsalat təcrübəsi gənclərin gələcəkdə biologiya, ekologiya ilə bağlı sahələrdə, o cümlədən, Bakı Zooloji Parkında işlə təmin olunmalarında və yüksək ixtisaslı kadrlar kimi formalaşmalarında mühüm rol oynayacaqdır.
Qeyd edək ki, Bakı Zooloji Parkında təşkil olunmuş istehsalat təcrübəsi 12.04.2024 tarixinə qədər davam edəcəkdir.