Elan və Xəbərlər
Bakı Zooloji Parkında heyvanların rifahının yaxşılaşdırılması üzrə təlimlər keçirilib
Bakı Zooloji Parkında 18-22 noyabr tarixlərində İsraildən dəvət olunmuş The Animal Behavior Community şirkətinin mütəxəssisləri tərəfindən kiperlər üçün təlim və seminarlar təşkil olunub.
Təlimin əsas məqsədi heyvanlarla iş zamanı təhlükəsizlik qaydalarına riayət olunmasını təmin etmək, heyvanların rifahını və qidalanmasını yaxşılaşdırmaq, onların qayğısına qalmaq və volyerlərin təbii yaşayış mühitlərinə uyğun zənginləşdirilməsi sahələrində müasir yanaşmaların tətbiqinin təşviqi olub.
Proqram çərçivəsində heyvanların davranışlarının təhlili aparılmış, onların ehtiyaclarının düzgün başa düşülməsi və müəyyən bacarıqların əldə edilməsi məqsədilə zoopark işçilərinə heyvanların məşq etdirilmə metodikaları və qaydaları haqqında ətraflı məlumatlar verilmişdir. Bununla yanaşı, təlim prosesini effektiv etmək üçün xarici mütəxəssislər tərəfindən kiperlərə volyerlərdə praktiki məşğələlər keçirilmişdir. Mütəxəssislərlə birgə kiperlər heyvanların aktivlik imkanlarını artırmaq üçün müvafiq yaşayış yerlərində bir sıra struktur dəyişiklikləri apararaq, əlavə təkmilləşdirmələr ediblər. Keçirilən təlimlər heyvanların həyat səviyyəsini yüksəltməklə yanaşı, Zooloji Parkda ziyarətçilər üçün daha maraqlı və interaktiv təcrübələr yaratmağa da imkan verir.
Təlimin sonunda, proqramı müvəffəqiyyətlə tamamlayan kiperlər The Animal Behavior Community şirkəti tərəfindən sertifikatla təltif olunublar.
Heyvanların rifahı ilə bağlı ən son elmi yanaşmaları tətbiq edən The Animal Behavior Community şirkəti heyvan davranışlarının daha yaxşı anlaşılmasını və onların həyat şəraitlərinin təkmilləşdirilməsini təmin etmək üçün mütəxəssislər arasında əməkdaşlıq və bilik mübadiləsini gücləndirir. Belə əməkdaşlıq və təlimlər heyvanların həyat tərzlərinin yaxşılaşdırılması sahəsində yüksək standartların tətbiqini təşviq etmək, müasir qulluq və zənginləşdirmə yanaşmalarını aşılamaq baxımından əhəmiyyətli rol oynayır. Eyni zamanda, keçirilən treninqlər Zooloji Parkın heyvanları üçün rifah standartlarının tətbiqini və onların müasir tələblərə uyğun şəkildə qorunmasını təmin etmək istiqamətində mühüm addımlardan sayılır.