Qara Pantera

Təbii arealı Cənub və Cənub-Şərqi Asiyanın, Cənubi və Mərkəzi Amerikanın, həmçinin ekvatorial Afrikanın tropik meşələrini, bataqlıqlarını və dağlıq ərazilərini əhatə edir. Ən çox Hindistan, Malayziya və Amazon hövzəsinin sıx meşələrində rast gəlinir.

Qara panteralar-pantera cinsinə aid böyük pişiklərin tünd rəngli fərdləridir və bu rəng melanizm adlanan genetik mutasiyanın nəticəsidir. Onlar ayrıca növ deyil; adətən Leopard (Panthera pardus) və ya Yaguar (Panthera onca) kimi tanınan növlərin qara rəng variasiyasıdır. Məsələn, Malayziyada yaşayan leopardların təxminən yarısının qara olması bu genetik xüsusiyyətin bəzi bölgələrdə geniş yayıldığını göstərir. Sıx, rütubətli və günəş işığının çətinliklə keçdiyi tropik meşələrdə tünd rəngli olmaq onlara üstünlük verir, çünki belə mühitdə daha az nəzərə çarpır və ova səssizcə yaxınlaşa bilirlər. Maraqlıdır ki, onların dərisi tamamilə qapqara görünməsinə baxmayaraq, işıq altında diqqətlə baxdıqda xallı naxışları yenə də seçmək mümkündür və bu, onların həqiqi mənşəyini gizlətmir.