Ağ şir

Ağ şirin təbii arealı son dərəcə məhduddur və demək olar ki, tamamilə Cənubi Afrikanın şimal-şərqində, Timbavati (Transvaal bölgəsi) ərazisində, Krüger Milli Parkı yaxınlığında cəmlənmişdir.

Ağ şir nə albinosdur, nə də ayrıca növ-bu, sadəcə nadir genetik xüsusiyyətin nəticəsidir. Onun gözləri və dərisi normal piqmentasiyaya malikdir, sadəcə melanin miqdarı az olduğu üçün tükləri ağ görünür. Bu xüsusiyyət nadir hallarda özünü göstərən resessiv genlə bağlıdır və nəticədə onların rəngi krem-bej çalardan qar kimi ağ tona qədər dəyişə bilir. Alimlər arasında belə bir fərziyyə də var ki, ağ rəngi formalaşdıran gen uzaq əcdadlardan miras qalıb. Ehtimal olunur ki, Buzlaq dövründə yaşayan şirlər üçün açıq rəngli tük örtüyü kamuflyaj baxımından üstünlük təşkil edirdi və həmin gen zamanla zəifləsə də, tamamilə yox olmayıb.