Qırmızıbaş hörücü

Şirvan Milli Parkı

Quşlar sinfinin Sərçəkimilər dəstəsinin Hörücülər fəsiləsinə aid quş növüdür. Azərbaycanda bütün dağlıq ərazilərin subalp və alp qurşağında yayılıb. Oturaq həyat tərzinə malik quşdur. Qışda çay dərələrinə və dağətəyi ərazilərə enir. Daşlıq və qayalıqların bir- birini əvəz etdiyi çəmənliklərdə, dik qayalıqların çat və yarıqlarındakı kolluqlarda yaşayır. Başındakı qırmızı “papağına” görə asanlıqla tanınan quşdur. Bədəninin uzunluğu 12,0–13,0 sm, qanad açıqlığı 6,9–8,0 sm, çəkisi 10–13 qr-dır. Başının yanları, boynu və döşünün ön hissəsi qara, alnı və təpəsi narıncı-qırmızı rəngdədir. Bədəninin qalan hissəsi boz-narıncı, qara-qonur alalı, quyruqüstü narıncı xallıdır. Dişi erkəyə bənzəyir, lakin ondan solğun və boz görünür. Mayın əvvəlində cütləşmə baş verir. Çoxalma dövründən sonra – iyunun ikinci yarısında onların dəstələrinə təsadüf etmək olur. Yuvasını qaya yarıqlarında və ya kolluqlarda qurur. Solğun mavi rəngli, qırmızı-qonur xallı və ya xalsız 3–5 yumurtası olur. İldə 2 dəfə yumurta qoyur. Bitki toxumları və həşəratlarla qidalanırlar.